აშშ-ის ეროვნული უსაფრთხოების საკითხებში მრჩეველმა ჯეიკ სალივანმა ნატო-ს გენერალურ მდივანთან იენს სტოლტენბერგთან სატელეფონო საუბრისას განიხილა აშშ-სა და ნატოს მზადყოფნის საკითხი რუსეთთან დიალოგის გასაგრძელებლად.

„მათ განიხილეს აშშ-სა და ნატოს მზადყოფნა, გააგრძელონ დიალოგი რუსეთთან, რათა იპოვონ დიპლომატიური გზა დეესკალაციისკენ. მათ ასევე ხაზი გაუსვეს მოკავშირეების მზადყოფნას დაიცვან ნატოს მოკავშირეების ტერიტორიები ნებისმიერი საფრთხისგან, მათ შორის აღმოსავლეთის ფლანგის გაძლიერებით რუსეთის პოტენციური აგრესიის საპასუხოდ“, - აღნიშნა აშშ-ის ეროვნული უსაფრთხოების საბჭოს პრეს-სპიკერმა ემილი ჰორნმა განცხადებაში.

მისი თქმით, სალივანმა და სტოლტენბერგმა ასევე აღნიშნეს "მათი საერთო შეშფოთება რუსეთის მიერ უკრაინის საზღვრის გასწვრივ ძალების მობილიზების შესახებ" და ხაზი გაუსვეს მათ ერთგულებას უკრაინის სუვერენიტეტისა და ტერიტორიული მთლიანობის მიმართ.