სერგეი ლავროვი - ლონდონთან ურთიერთობის ნორმალიზება შესაძლებელია მხოლოდ დიალოგის გზით, რომელიც ეფუძნება ერთმანეთის ლეგიტიმური ინტერესების აღიარებას
მოსკოვსა და ლონდონს შორის ურთიერთობების ნორმალიზება შესაძლებელია მხოლოდ თანაბარი დიალოგის გზით, - ამის შესახებ რუსეთის საგარეო საქმეთა მინისტრმა სერგეი ლავროვმა ბრიტანელ კოლეგასთან, ლიზ ტრასთან შეხვედრის წინ განაცხადა.
„რა თქმა უნდა, ურთიერთობების ნორმალიზება შესაძლებელია მხოლოდ დიალოგის გზით, რომელიც ეფუძნება ერთმანეთის ლეგიტიმური ინტერესების აღიარებასა და ორმხრივად მისაღები გადაწყვეტილებების ძიებას“, - განაცხადა ლავროვმა მოლაპარაკებების დაწყებამდე.
მისი თქმით, თუ ვიზიტი მიზნად ისახავს კრიზისის დაძლევას, მოსკოვი ადეკვატურად უპასუხებს.
„ვერ ვიქნებით კმაყოფილი ურთიერთობებით, რომლებიც, ალბათ, ბოლო წლების განმავლობაში ყველაზე დაბალ ნიშნულზეა“, - აღნიშნა ლავროვმა.
მან იმედი გამოთქვა, რომ მხარეები აღადგენენ ორმხრივი თანამშრომლობის მექანიზმებს. სერგეი ლავროვისა და ლიზ ტრასის შეხვედრა დახურულ კარს მიღმა მიმდინარეობს.
