ნატო-ს ქვეყნებმა აღმოსავლეთ ფლანგზე ალიანსის კონტიგენტის გაზრდაზე წერილობითი თანხმობა განაცხადეს, - ინფორმაციას dpa-ი სანდო წყაროზე დაყრდნობით ავრცელებს.

გამოცემის ცნობით, საუბარია ალიანსის საერთაშორისო ძალების რუმინეთში, სლოვაკეთსა და ბულგარეთში განთავსებაზე. აღსანიშნავია, რომ ამ დრომდე, ნატო-ს აღმოსავლეთ ფლანგზე ალიანსის ჯარები განლაგებული იყო მხოლოდ ბალტიის ქვეყნებსა და პოლონეთში.

dpa-ი წერს, რომ რუმინეთში, სლოვაკეთსა და ბულგარეთში ჯარების განთავსების გადაწყვეტილება, სავარაუდოდ, 16 თებერვალს ნატო-ს თავდაცვის მინისტრების შეხვედრაზე კიდევ ერთხელ დადასტურდება, რის შემდეგაც იგი ოფიციალურად გახდება ცნობილი. გადაწყვეტილების განხორციელება კი გაზაფხულიდან დაიწყება. ნატო ხაზს უსვამს, რომ აღმოსავლეთ ევროპაში ალიანსის დამატებითი ძალების განლაგება რუსეთის ფედერაციის ქმედებებზე რეაგირებას წარმოადგენს.