ვლადიმერ პუტინის თანაშემწე - ბაიდენმა პუტინთან საუბარში, უკრაინის გარშემო არსებული დაძაბულობის კონტექსტში, ანტირუსული სანქციები ახსენა
რუსეთისა და შეერთებული შტატების პრეზიდენტების ვლადიმერ პუტინისა და ჯო ბაიდენის სატელეფონო საუბარი დაბალანსებული და საქმიანი იყო, - რუსული მედიის ინფორმაციით, ამის შესახებ ვლადიმერ პუტინის თანაშემწემ, იური უშაკოვმა განაცხადა.
მისი თქმით, ჯო ბაიდენმა ვლადიმერ პუტინთან საუბარში ანტირუსული სანქციები ახსენა, თუმცა აქცენტი ამ საკითხზე არ გაკეთებულა.
„აშშ-ის პრეზიდენტმა ჯო ბაიდენმა ვლადიმერ პუტინთან სატელეფონო საუბარში, როგორც მოსალოდნელი იყო, უკრაინის გარშემო არსებული დაძაბული სიტუაციის კონტექსტში ანტირუსული სანქციები ახსენა, თუმცა ამ საკითხზე აქცენტი არ გაკეთებულა,“ - აღნიშნა უშაკოვმა.
მისი თქმით, დღევანდელი საუბარი, რომელიც ერთ საათზე მეტხანს გაგრძელდა, რუსეთის უკრაინაში მოსალოდნელ შეჭრასთან დაკავშირებით აშშ-ის ოფიციალური პირების მიერ შექმნილი „უპრეცედენტო ისტერიის გარემოში“ შედგა.
იური უშაკოვის ინფორმაციით, პრეზიდენტებმა განიხილეს უკრაინის „თანამედროვე იარაღით“ მომარაგების საკითხი.
„განიხილეს უკრაინის თანამედროვე იარაღით მომარაგების საკითხი, რასაც დასავლეთის ქვეყნები მიზანმიმართულად აკეთებენ, რითაც ხელს უწყობენ უკრაინის უსაფრთხოების ძალების მხრიდან შესაძლო პროვოკაციებს, როგორც დონბასთან, ასევე ყირიმთან მიმართებაში,“- აღნიშნა უშაკოვმა.
