შავი ზღვის საერთაშორისო უნივერსიტეტმა ავტორიზაციისთვის მზადება ორი წლით ადრე დაიწყო.
IBSU-ს ცნობით, უნივერსიტეტის ადმინისტრაციული, აკადემიური პერსონალი და სტუდენტები განათლების ხარისხის განვითარების ცენტრის წარმომადგენლებს შეხვდნენ. საინფორმაციო შეხვედრის დროს განათლების ხარისხის განვითარების ცენტრის წარმომადგენლებმა უნივერსიტეტის თანამშრომლებსა და სტუდენტებს, ინფორმაცია ავტორიზაციის სტანდარტებთან, თვითშეფასებასა და ავტორიზაციისთვის მომზადების რეკომენდებულ პროცესთან დაკავშირებით გააცნეს.
„აღნიშნული შეხვედრა მნიშვნელოვანია, რათა ყველა დაინტერესებული მხარის მიერ სრულად მოხდეს გააზრება ავტორიზაციის სტანდარტების, პროცესების, წარმოდგენილი მტკიცებულებების/დადასტურებების მნიშვნელობისა და მომზადების პროცესის შესახებ. ასევე, თანამშრომლებმა და სტუდენტებმა საკუთარი როლი და მნიშვნელობა შესაბამისად შეაფასონ, რათა უნივერსიტეტის განვითარების და ავტორიზაციის თვითშეფასების ანგარიშის მომზადების პროცესში აქტიურად იყვნენ ჩართულნი“, - განაცხადა ხარისხის უზრუნველყოფის მიმართულებით შავი ზღვის საერთაშორისო უნივერსიტეტის პრორექტორმა, ნინო ჯოჯუამ.
მათივე ინფორმაციით, შავი ზღვის საერთაშორისო უნივერსიტეტმა შემდეგი ავტორიზაცია 2024 წელს უნდა გაიაროს.
