დიმიტრი პესკოვი 20 თებერვლის შემდეგ უკრაინაში შეჭრის შესახებ გავრცელებულ ცნობებს „მორიგ სიყალბეს“ უწოდებს
კრემლის პრესსპიკერმა დიმიტრი პესკოვმა გაზეთ Politico-ს მონაცემებს 20 თებერვლის შემდეგ უკრაინაზე სავარაუდო შესაძლო თავდასხმის შესახებ ,,მორიგი სიყალბე“ უწოდა.
„ალბათ, კიდევ ერთი „ფეიკ“ ამბავი გამოჩნდა. იმედი მაქვს, მაინც არ დავიჯერებთ და არ ვენდობით ასეთ სიყალბეს. ეს ყველაფერი აღმოჩნდა უპასუხისმგებლო ყალბი ამბები, რომელთა არცერთმა ავტორმა მოგვიანებით არ აღიარა, რომ შეცდა“, - განაცხადა პესკოვმა.
მისი თქმით, ბოლო დროს ზოგიერთი დასავლური სახელმწიფოსა და ორგანიზაციის წარმომადგენლებმა აჩვენეს ღია ინფორმაციული აგრესია მოსკოვის მიმართ.
„ბევრი დასავლური ქვეყნის წარმომადგენელი, მრავალი ორგანიზაციის, მათ შორის ნატოს წარმომადგენლები, ბოლო დროს ავრცელებენ განცხადებებს, არსებითად, დაუფარავ საინფორმაციო აგრესიას ჩვენი ქვეყნის და საქმის რეალური მდგომარეობის წინააღმდეგ“, - განაცხადა კრემლის სპიკერმა.
მან აღნიშნა, რომ რუსეთი ებრძვის ამ აგრესიას და ცდილობს დაუპირისპიროს მას დაბალანსებული, მშვიდი, კონსტრუქციული განცხადებები, რომლებიც დიალოგისკენ მოუწოდებენ. როგორც პესკოვმა აღნიშნა, რუსეთის პრეზიდენტის ვლადიმერ პუტინის ინიციატივების მთავარი მიზანია უსაფრთხოების გარანტიების შესახებ რეალური დიალოგი.
