ანასტასია შატალოვას მკვლელობის საქმეზე დაკავებული 3 პირის საქმეზე თბილისის საქალაქო სასამართლოში წინასასამართლო პროცესი მიმდინარეობს
ანასტასია შატალოვას მკვლელობის საქმეზე დაკავებული 3 პირის საქმეზე თბილისის საქალაქო სასამართლოში წინასასამართლო პროცესი მიმდინარეობს.
დღევანდელ სხდომაზე მტკიცებულებების დასაშვებობაზე იმსჯელებენ. ამასთან, დღევანდელ პროცესზევე გახდება ცნობილი, აირჩევენ თუ არა ბრალდებულები ნაფიც მსაჯულთა სასამართლოს.
როგორც საქმის პროკურორი ლევან ვეფხვაძე აცხადებს, სახელმწიფო ბრალდებას სამივე ბრალდებულის მიმართ უტყუარი მტკიცებულებები აქვს წარმოდგენილი, მათ შორის, თუ როგორ დაგეგმეს მათ წინასწარ მკვლელობა და როგორ მოქმედებდნენ ისინი შეთანხმებულად. ვეფხვაძის თქმით, მკვლელობის მოტივი ამ დროისთვის დადგენილი არ არის.
ცნობისთვის, ანასტასია შატალოვა თბილისში, საბურთალოზე 18 ოქტომბერს მოკლეს. აღნიშნულთან დაკავშირებით სამართალდამცავებმა ბექა ლატარია, ბიძინა ხასია და ლევან რაჯავი დააკავეს.
ბექა ლატარიას ბრალი განზრახ მკვლელობის, ცეცხლსასროლი იარაღის უკანონოდ შეძენა-შენახვა-ტარებისა და განსაკუთრებით დიდი ოდენობით ნარკოტიკული საშუალების შეძენა-შენახვის მუხლით აქვს წარდგენილი.
ბიძინა ხასიას გამოძიება განსაკუთრებით მძიმე დანაშაულის დაფარვას, პოლიციელების სიცოცხლის მოსპობის მცდელობისთვის და საბრძოლო მასალის უკანონოდ შეძენა-შენახვა-ტარებას ედავება.
ლევან რაჯავს გამოძიება პოლიციისთვის წინააღმდეგობის გაწევას და ნარკოტიკული საშუალებების შეძენა-შენახვას ედავება.
