ფრაქცია "ნაციონალური მოძრაობის" წევრი რომან გოცირიძე "გირჩის" ინიციატივას, რომელიც საარჩევნო სიებში წარსადგენ დეპუტატობის კანდიდატთა მინიმალური ზღვარის გაუქმებას ითვალისწინებს, საფრთხის შემცველად მიიჩნევს.
აღნიშნული კანონის პროექტის მიღების შემთხვევაში, გოცირიძე "ასობით ხუთკაციანი პრორუსული პარტიის შექმნის რისკს ხედავს".
"ასეთებს რუსები კარგად აფინანსებენ, მომძლავრდნენ, გაყოყოჩდნენ და უკრაინაში მიმდინარე პროცესების შემდეგ გული მიეცათ. ესენი შავრაზმული ძალები, მოღალატეები არიან, რომლებიც პირდაპირ რუსეთიდან ფინანსდებიან. შეიძლება მათი დაყოფა, დაქუცმაცება და ასე შემდეგ. ამიტომ საარჩევნო სიების რეგისტრირებისას მინიმალური ზღვარის არსებობა აუცილებელია. შეიძლება ზღვარის გადახედვაზე ვიმსჯელოთ, მაგრამ საერთოდ გაუქმება არ მგონია სწორი იყოს. გასათვალისწინებელია საერთაშორისო პრაქტიკაც", - განაცხადა რომან გოცირიძემ.
"გირჩი" პროპორციულ საარჩევნო სიებში წარსადგენ, არჩევნებში მონაწილე დეპუტატობის კანდიდატთა მინიმალური რაოდენობის გაუქმებას და კანონით დაწესებული ამ ბარიერის მოხსნას ითხოვს. მათ მიერ მომზადებული საკანონმდებლო ინიციატივა პარლამენტში უკვე დარეგისტრირდა. კანონპროექტი პარლამენტის ბიუროს დღეს წარედგინება.