ეკონომიკისა და მდგრადი განვითარების მინისტრის, ლევან დავითაშვილის განცხადებით, თუ ინვესტორები დაინტერესდებიან საქართველოში ელექტრობატარეების წარმოების მხრივ, მათ მაქსიმალური ხელშეწყობა ექნებათ.
ამასთან, მისი თქმით, საქართველოში ელექტრომობილების წარმოება საკმაოდ სასურველი პროექტია, მაგრამ საკმაოდ რთული, რადგან განსაკუთრებით პანდემიამ თავისი კორექტივები შეიტანა. დავითაშვილის თქმით, ეკონომიკის სამინისტროსთვის პრიორიტეტულია იმგვარი სამრეწველო ინვესტიციები, რომელმაც შეიძლება საკმაოდ ბევრი ადამიანი დაასაქმოს და აწარმოოს პროდუქტი.
„თუ მოხერხდა და ინვესტორების მხრიდან დაინტერესება იქნება ასეთი ბატარეების წარმოების, ჩვენ ხელს მაქსიმალურად შევუწყობთ. გვაქვს პაკეტი, რომელსაც უცხოური ინვესტიციების ხელშეწყობის კუთხით უახლოეს ხანებში წარმოვადგენთ. ის უცხოელ ინვესტორებს დამატებით მოტივატორებს სთავაზობს საქართველოში განახორციელონ ინვესტიციები. თუმცა, ჩვენ გვექნება კიდევ უფრო კრეატიული და ღია მიდგომა. ანუ იმ საჭიროებებზე მორგებული, რომელიც შესაძლოა, ინვესტორს დასჭირდეს და შეიძლება ამ კონკრეტულ პაკეტში გათვალისწინებული ვერ იყოს, იმ შემთხვევაში თუ ინვესტიციები მართლაც მასშტაბურია. ეს უნდა განვსაზღვროთ, რა არის მასშტაბური და რამხელა დასაქმებას ითვალისწინებს. ამ კვირის განმავლობაში შეხვედრა გვექნება ელექტროავტომობილების მწარმოებლებთან, ველოდებით პოტენციურ ინვესტორებს, მათ შორის ელექტრობატარეების წარმოების შესაძლებლობის კუთხით მსოფლიოში ერთ-ერთ ყველაზე დიდ კომპანიასთან. ეს შეხვედრა ეკონომიკის სამინისტროში ამ კვირაში შედგება“, - აცხადებს დავითაშვილი.