გაეროში ბრიტანეთის ელჩი - თვეების განმავლობაში რუსეთს უკრაინის თავზე იარაღი ჰქონდა მიბჯენილი, ახლა პუტინს სასხლეტზე უდევს თითი
გაერო-ში გაერთიანებული სამეფოს ელჩის, ბარბარა ვუდვორდის განცხადებით, უკრაინაში სრულმასშტაბიანი კონფლიქტი უზარმაზარ მსხვერპლსა და გამანადგურებელ ჰუმანიტარულ შედეგებს მოიტანს.
„თვეების განმავლობაში რუსეთს უკრაინის თავზე იარაღი ჰქონდა მიბჯენილი, ახლა პუტინს სასხლეტზე უდევს თითი,“- განაცხადა ბარბარა ვუდვორდმა გაეროს უშიშროების საბჭოს საგანგებო სხდომაზე.
„44 მილიონიან ქვეყანაში სრულმასშტაბიანი კონფლიქტი ორივე მხარეს უზარმაზარ ტანჯვასა და მსხვერპლს მოუტანს და დამანგრეველი ჰუმანიტარული შედეგები მოჰყვება“, - განაცხადა ელჩმა.
შეგახსენებთ, გაერო უშიშროების საბჭოს საგანგებო სხდომას მართავს. სხდომის პარალელურად, რუსეთის პრეზიდენტმა, ვლადიმერ პუტინმა მიმართვა გაავრცელა და განაცხადა, რომ დონბასში „სამხედრო ოპერაციის“ ჩატარების გადაწყვეტილება მიიღო.
