საქართველოს ეროვნული სიმფონიური ორკესტრი, სამხატვრო ხელმძღვანელთან ნიკოლოზ რაჭველთან და ქართველ მუსიკოსებთან ერთად უკრაინელი ხალხისა და სახელმწიფოს მხარდასაჭერად დღეს, 17:00 საათზე აქციას გამართავს. ამის შესახებ ნიკოლოზ რაჭველი სოციალურ ქსელში წერს.

მისი თქმით, აქციაში მონაწილეობას მომღერალი ნინო ქათამაძე მიიღებს და საქართველოსა და უკრაინის ჰიმნები შესრულდება.

„დღეს 5 საათზე ეროვნული სიმფონიური ორკესტრი სარეპეტიციო სივრციდან უკრაინელი ხალხის, ჩვენი კოლეგების, მეგობრების და მათი სუვერენული სახელმწიფოსადმი თანადგომისა და მხარდაჭერის გამოსახატავად შევასრულებთ საქართველოსა და უკრაინის ჰიმნებს. უკვე შემოგვიერთდა უკრაინელების უსაყვარლესი არტისტი ნინო ქათამაძე და ჩემს კოლეგებს შორის ვისაც ექნება დრო და სურვილი ამ პატარა, მაგრამ გულიან აქციას შემოუერთდეს შეუძლია გვეწვიოს აღმაშენებლის 182-ში (ყოფილი მუსკომედიის და ამჟამად საქართველოს ეროვნული მუსიკალური ცენტრის შენობა). მშვიდობა და სოლიდარობა უკრაინას!“ - წერს ნიკოლოზ რაჭველი.