ზედიზედ მეორე ღამეა, ათასობით ქართველი გამოვიდა დედაქალაქ თბილისში, რათა გააპროტესტოს რუსეთის შეჭრა უკრაინაში. ამის შესახებ სტატიას BBC-ი აქვეყნებს.
როგორც BCC-ი წერს, რუსეთი საქართველოში 2008 წელს შეიჭრა პრორუსული სეპარატისტული ძალების დასახმარებლად. ექსპერტებმა ბევრი პარალელი გაავლეს ამ კონფლიქტსა და უკრაინაში მიმდინარე კონფლიქტს შორის.
მედია წერს, რომ თბილისში 30 000-მდე ადამიანი იყო შეკრებილი.
"ზოგიერთი მათგანი გამოდიოდა ლოზუნგებით საქართველოს ამჟამინდელი ხელისუფლების წინააღმდეგ, მას შემდეგ რაც მმართველმა პარტიამ განაცხადა, რომ არ შეუერთდება დასავლეთის სანქციებს რუსეთის წინააღმდეგ".
BBC-ის ასევე საქართველოს პრემიერ-მინისტრის, ირაკლი ღარიბაშვილის დღეს გაკეთებული განცხადებიდან ციტირებს:
„მსურს მკაფიოდ და ცალსახად განვაცხადო, ჩვენი ეროვნული ინტერესებიდან და ხალხის ინტერესებიდან გამომდინარე, საქართველო არ გეგმავს ფინანსურ და ეკონომიკურ სანქციებში მონაწილეობას, რადგან ეს მხოლოდ ჩვენს ქვეყანას და მოსახლეობას დააზარალებს“, - განაცხადა პრემიერ-მინისტრმა ირაკლი ღარიბაშვილმა, წერს გამოცემა.
"აქციის მონაწილეებმა განაცხადეს, რომ პრემიერის ეს ნაბიჯი უკრაინელი ხალხის მიტოვებას წარმოადგენს", - ნათქვამია სტატიაში.