გერმანია თხევადი ბუნებრივი აირის (LNG) ორ ტერმინალს ააშენებს ბუნებრივი აირის მარაგების გაზრდის მიზნით, რათა შემცირდეს რუსეთის გაზზე დამოკიდებულება უკრაინაში რუსეთის შეჭრის შემდეგ, - ამის შესახებ გერმანიის კანცლერმა ოლაფ შოლცმა განაცხადა.

„ჩვენ მეტს გავაკეთებთ იმისთვის, რომ უზრუნველვყოთ ჩვენი ქვეყნის უსაფრთხო ენერგომომარაგება. ჩვენ უნდა შევცვალოთ კურსი, რათა დავძლიოთ ჩვენი დამოკიდებულება იმპორტზე ენერგიის ინდივიდუალური მიმწოდებლებისგან“, - განუცხადა მან დეპუტატებს ბუნდესტაგის სპეციალურ სხდომაზე.

შეგახსენებთ, მიმდინარე კვირის დასაწყისში გერმანიამ შეაჩერა 11 მილიარდი დოლარის ღირებულების Nord Stream 2 ბალტიის ზღვის გაზსადენის პროექტი უკრაინის მიმართ რუსეთის ქმედებების საპასუხოდ.