ირაკლი ღარიბაშვილი - ჩვენ ვცხოვრობთ რუსულ ჯართან ერთად - ამ ვითარებაში, როცა სიტუაცია ძალიან არაპროგნოზირებადია, მიუღებელი და გაუგებარი იყო ის ანტისახელმწიფოებრივი აქციები, რომელიც იმართებოდა

ჩვენ ვცხოვრობთ რუსულ ჯართან ერთად. ამ ვითარებაში, როდესაც სიტუაცია ძალიან არაპროგნოზირებადი და მოწყვლადია მთელი რეგიონისა და ევროპის მასშტაბით, აბსოლუტურად მიუღებელი და გაუგებარი იყო ის ანტისახელმწიფოებრივი აქციები, რომელიც იმართებოდა, - ამის შესახებ საქართველოს პრემიერ-მინისტრმა ირაკლი ღარიბაშვილმა ჟურნალისტებს განუცხადა.

პრემიერის თქმით, ეს იმ ძალების მიერ იყო ორგანიზებული, რომლებიც უკვე წლებია ანტისახელმწიფოებრივ და ანტიეროვნულ პოლიტიკას ატარებენ.

„სამწუხარო რეალობაა ის, რომ მსოფლიოში, არცერთ ქვეყანაში, ისეთ ვითარებაში, რომელიც ახლა უკრაინაშია ანუ რუსეთ-უკრაინის ომის დროს, მსოფლიოს არცერთ ქვეყანაში არ გამართულა საპროტესტო აქციები და არ მოუთხოვიათ მთავრობის გადადგომა. მითუმეტეს, ჩვენი სიტუაცია არის განსაკუთრებული და უნიკალური. რას ვგულისხმობ? ჩვენ ვართ ოკუპირებული, ჩვენი ქვეყნის 20% არის ოკუპირებული და რუსის ჯარი დგას ჩვენს ტერიტორიაზე. ჩვენ ვცხოვრობთ რუსულ ჯართან ერთად. ამ დროს, ამ ვითარებაში, როდესაც სიტუაცია ძალიან არაპროგნოზირებადი და მოწყვლადია მთელი რეგიონისა და ევროპის მასშტაბით, რა თქმა უნდა, აბსოლუტურად მიუღებელი და გაუგებარი იყო ის ანტისახელმწიფოებრივი აქციები, რომელიც იმართებოდა.

აქვე მინდა ვთქვა, რა თქმა უნდა, პირადად ჩემთვის, მოქალაქისთვის აბსოლუტურად მიუღებელია აღნიშნული. სამწუხაროდ, უნდა ვთქვათ, რომ ეს იმ ძალების მიერ იყო ორგანიზებული, რომლებიც უკვე წლებია ატარებენ ანტისახელმწიფოებრივ, ანტიეროვნულ პოლიტიკას. ეს არის მოღალატეობრივი პოლიტიკა, ეს არის მეხუთე კოლონა, ეს არის შულავერის კომიტეტი, რომელიც საქართველოში მოქმედებს. ამიტომ, ამას ჩვენ არ დავუშვებთ და ბუნებრივია, ჩვენი ქვეყნის, მოსახლეობის ინტერესს ბოლომდე დავიცავთ“. - განაცხადა ირაკლი ღარიბაშვილმა.

ლევან შენგელია - მხოლოდ რუსეთის ფუნდამენტურმა დამარცხებამ უკრაინასთან და მთლიანად დასავლეთთან დაპირისპირებაში შეიძლება აგვაცილოს თავიდან ცუდი მომავალი
გრიგორი კუკურუზა - ომით მიყენებული ზარალი დაახლოებით 1,1-1,2 ტრილიონ აშშ დოლარს შეადგენს - უკრაინას იმედი აქვს, რომ ქვეყნის აღსადგენად სახსრებს აგრესორი რუსეთისგან მიიღებს
ქართული პრესის მიმოხილვა 28.11.2022
PSP განცხადებას ავრცელებს