პუტინი კომპულსიური მატყუარაა, - ამის შესახებ ბრიტანეთის ჯანდაცვის მინისტრმა, საჯიდ ჯავიდმა განაცხადა.
როგორც მან BBC Radio-სთან მიცემულ ინტერვიუში რუსეთის სამხედრო სიძლიერეზე საუბრისას აღნიშნა, დასავლეთმა „რეალისტურად უნდა შეაფასოს მოვლენათა განვითარების შესაძლო მიმართულება“.
„ვშიშობ, თუკი ახლა ვერ გამოვნახავთ იმის საშუალებას, რომ პუტინი შევაჩეროთ, ყველაფერი გაცილებით უფრო ცუდად იქნება. როგორც ჩანს, რუსებს არ უნდა ვენდოთ - განსაკუთრებით კი პრეზიდენტ პუტინს, რომელიც, როგორც ვიცით, არის კომპულსიური მატყუარა. მას გამოგონილი ამბისა და ფაქტების ერთმანეთისგან გარჩევა უჭირს. საკუთარი გამოცდილებით გეტყვით, შინაგან საქმეთა მინისტრად მუშაობის პერიოდში, როდესაც სოლსბერიზე არალეგალური ქიმიური იარაღით თავდასხმებთან გვქონდა საქმე, რუსეთი დიდი ხნის განმავლობაში გვატყუებდა“, - განაცხადა ჯავიდმა.