ქვეყნის დეოკუპაცია ის თემაა, რომელიც არათუ დღეს, არამედ ყოველდღიურად უნდა იყოს ყველაზე მაღლა საშინაო და საგარეო პოლიტიკის დღის წესრიგში, ვიდრე ეს დეოკუპაცია არ განხორციელდება, - ამის შესახებ „ინტერპრესნიუსს“ საერთაშორისო ურთიერთობების საკითხებში პრეზიდენტის ყოფილმა მრჩეველმა, თენგიზ ფხალაძემ განუცხადა, რითაც პარლამენტის თავმჯდომარის, შალვა პაპუაშვილის განცხადებასთან დაკავშირებულ კითხვას უპასუხა იმის თაობაზე, რომ უკრაინის საკითხთან საქართველოს ტერიტორიების დეოკუპაციის თემის მიბმა არაკეთილსინდისიერი ქმედება იქნება.

მისივე თქმით, დღეს უკრაინის თემამ გამოაღვიძა მსოფლიო და სწორედ ის დროა რუსეთს პასუხი მოეთხოვოს აბსოლუტურად ყველაფრისთვის, რაც მას გაუკეთებია, მათ შორის საქართველოში.

„დეოკუპაციის თემა ეს ის თემაა, რომელიც დღის წესრიგში ყოველთვის უნდა იდგეს. მე ვერ წარმომიდგენია საქართველოს პოლიტიკური დღის წესრიგი ამის გარეშე. იმიტომ, რომ ეს არის ჩვენი ქვეყნისთვის ყველაზე მთავარი და მტკივნეული თემა. ამის გარეშე ქართული საშინაო და საგარეო პოლიტიკური დღის წესრიგი წარმოუდგენელია. დღეს, როდესაც მთელი მსფოლიო ლაპარაკობს რუსეთის უკანონო ქმედებებზე სხვა სახელმწიფოების მიმართ, რა თქმა უნდა, ამ კონტექსტში უნდა იყოს საუბარი რუსეთის უკანონო ქმედებებზე საქართველოსთან მიმართებით. ასევე, როცა საუბარია იმაზე რუსეთს უნდა მოეთხოვოს პასუხი, მან გაიყვანოს თავისი ჯარები იმ ქვეყნებიდან, სადაც ისინი უკანონოდ დგანან, რა თქმა უნდა, ამ კონტექსტში საქართველოც უნდა იგულისხმებოდეს, ისევე როგორც იმ კონტექსტში, რომ მან უნდა წაიღოს ე.წ. აღიარება. ეს ის თემაა, რომელიც არათუ დღეს, არამედ ყოველდღიურად უნდა იყოს ყველაზე მაღლა საშინაო და საგარეო პოლიტიკის დღის წესრიგში, სანამ ეს დეოკუპაცია არ განხორციელდება.

დღეს უკრაინის თემამ გამოაღვიძა მსოფლიო და სწორედ ის დროა რუსეთს პასუხი მოეთხოვოს აბსოლუტურად ყველაფრისთვის, რაც მას გაუკეთებია, მათ შორის საქართველოში. ეს არის დღევანდელ დღეს აუცილებელი, რომ ამ საერთო დღის წესრიგში საქართველოს თემა მაქსიმალურად იყოს აქტუალური. რუსეთმა ფასი არამხოლოდ უკრაინისთვის, არამედ საქართველოსთვისაც უნდა გადაიხადოს აქედანაც უნდა მოეთხოვოს გასვლა“, - განაცხადა ფხალაძემ.

კითხვაზე, უნდა იყოს თუ არა ხელისუფლება რუსეთთან მიმართებით საკუთარ მოწოდებებში უფრო მკაცრი, ფხალაძის თქმით, „მას არ ესმის ამაზე თავის შეკავება“.

„შეუძლებელია ქვეყანას ჰქონდეს პოლიტიკური დღის წესრგი ამის გარეშე, ამ საკითხში უნდა ვიყოთ სუპერ აქტიურები“, - განაცხადა ფხალაძემ.

ცნობისთვის, პარლამენტის თავმჯდომარის, შალვა პაპუაშვილის შეფასებით, არანაირი რეალისტური საფუძველი არ აქვს საუბარს იმის თაობაზე, რომ უკრაინაში მიმდინარე პროცესები ახალ შესაძლებლობებს ხსნის საქართველოს ოკუპირებული ტერიტორიების დეოკუპაციასთან დაკავშირებით. როგორც შალვა პაპუაშვილმა „პალიტრანიუსის“ გადაცემა „დღის ნიუსრუმში“ განაცხადა, საქართველოსთან დაკავშირებული თემატიკის გააქტიურება მაშინ, როცა უკრაინაში ომი გრძელდება, არაკეთილსინდისიერი დამოკიდებულებაა.