მელიტოპოლში რუსმა სამხედროებმა ბუნტი მოაწყვეს. 70 სამხედრომ უარი თქვა მათი ხელმძღვანელობის ბრძანებების შესრულებაზე. ამის შესახებ ზაპოროჟიეს რეგიონალური სამხედრო ადმინისტრაციის პრესსამსახური "ფეისბუქზე" იტყობინება.

„24 მარტს მივიღეთ ინფორმაცია, რომ 70-მა რუსმა სამხედრომ მოაწყო ბუნტი მელიტოპოლში განლაგებულ რუსეთის ფედერაციის საოკუპაციო ძალების ნაწილებში და უარი თქვა მათი ხელმძღვანელობის ბრძანებების შესრულებაზე და ზაპოროჟიეს დამცველების წინააღმდეგ საომარ მოქმედებებში მონაწილეობაზე. ჩვენ ვურჩევთ ოკუპანტებს: დანებდით, მიიღეთ შანსი დარჩეთ ცოცხლები“, - ნათქვამია განცხადებაში.