ორგანიზაცია “ინტერპოლმა” მოლდოვაში, უკრაინიდან ჩასული ლტოლვილების დიდი ნაკადის ფონზე, ტრეფიკინგის ფაქტების თავიდან აცილების მიზნით ჯგუფი გაგზავნა.
CNN-ის ინფორმაციით, „ინტერპოლის“ თანამშრომლები დედაქალაქ კიშინიოვსა და ლტოლვილთა სხვადასხვა ბანაკებში განთავსდებიან.
უწყების ცნობით, მათ უკვე მიიღეს შეტყობინებები ადამიანებით მოვაჭრეებისა და კონტრაბანდისტების შესახებ, რომლებიც სასაზღვრო გამშვებ პუნქტებზე ჩასაფრებულები არიან იმისთვის, რომ „დაუცველ უკრაინელებზე ინადირონ.“
„ბავშვები და თანმხლები პირების გარეშე მყოფი არასრულწლოვნები განსაკუთრებით დაუცველები არიან კონტრაბანდისტებისა და ადამიანებით მოვაჭრეების მიერ ექსპლუატაციის განხორციელების მიმართ“, - აცხადებენ „ინტერპოლში“.
ცნობისათვის, უკრაინაში რუსეთის შეჭრის შემდეგ, მეზობელ მოლდოვას თითქმის 380 000-მა უკრაინელმა შეაფარა თავი.