უკრაინაში ომის დაწყებიდან დღემდე 139 ბავშვი გარდაიცვალა, ხოლო 205 დაშავდა. ამის შესახებ ინფორმაციას უკრაინის პროკურატურა ავრცელებს.

"ყოველდღიური დაბომბვების შედეგად 733 საგანმანათლებლო დაწესებულება დაზიანდა. მათგან 74 მთლიანად განადგურდა. უმძიმესი მდგომარეობაა დონეცკში, ხარკოვში, მიკოლაევში, სუმიში, კიევში, ხერსონში, ჩერნიგოვის რეგიონებში და ქალაქ კიევში", - ნათქვამია პროკურატურის განცხადებაში.

ამასთან, აღნიშნულია, რომ ეს მონაცემები არ არის საბოლოო, რადგან აქტიური საომარი მოქმედებების რაიონებში და დროებით ოკუპირებულ ტერიტორიებზე არ არსებობს დაბომბვის ადგილების შემოწმების შესაძლებლობა. სახელმწიფო სასაზღვრო სამსახურის ინფორმაციით, რუსი დამპყრობლები უკრაინელ ბავშვებს იტაცებენ და მათ მშობლებს აშანტაჟებენ.