ე.წ ლუგანსკის სახალხო რესპუბლიკის ხელმძღვანელის ლეონიდ პასეჩნიკის განცხადებით, არ გამორიცხავენ, რომ უახლოეს პერიოდში ლუგანსკში რუსეთთან შეერთების მოთხოვნით შესაძლოა რეფერენდუმი ჩატარდეს.

ინფორმაციას რუსული საინფორმაციო სააგენტო RIA ავრცელებს.

„ვფიქრობ, უახლოეს მომავალში რესპუბლიკის ტერიტორიაზე რეფერენდუმი ჩატარდება. ხალხი გამოიყენებს თავის საბოლოო კონსტიტუციურ უფლებას და გამოთქვამს აზრს რუსეთის ფედერაციაში გაწევრიანების შესახებ“, - აცხადებს პასეჩნიკი.

გარდა ამისა, ე.წ. „დონეცკისა და ლუგანსკის სახალხო რესპუბლიკების“ ლიდერებმა, დენის პუშლინმა და ლეონიდ პასეჩნიკმა რუსეთის პრეზიდენტს, ვლადიმერ პუტინს 24 თებერვალს „უკრაინის შეიარაღებული ძალების აგრესიის მოგერიებაში დახმარება“ სთხოვეს, რასაც ვლადიმერ პუტინის მხრიდან ამ ორი ოლქის დამოუკიდებლობის აღიარება მოჰყვა.

რუსეთის პრეზიდენტმა, ვლადიმერ პუტინმა ოკუპირებული დონეცკისა და ლუგანსკის ე.წ. „დამოუკიდებლობა“ თებერვალში აღიარა.