ქვეყანა ინფიცირების კუთხით სტაბილურ რიცხვს აჩვენებს. მოსალოდნელია, შემდეგი დღეების განმავლობაში კიდევ უფრო მეტად შემცირდეს, - ამის შესახებ თსსუ-ს პროფესორმა, იმუნიზაციის ტექნიკურ მრჩეველთა ეროვნული ჯგუფის ხელმძღვანელმა ივანე ჩხაიძემ ქვეყანაში არსებულ ეპიდვითარებაზე საუბრისას განაცხადა.

როგორც ივანე ჩხაიძე განმარტავს, არსებული ეპიდვითარება ოპტიმიზმის საფუძველს იძლევა.

„დღევანდელი მდგომარეობა გარკვეული ოპტიმიზმის საფუძველს გვაძლევს. არამხოლოდ ინფიცირებულების რაოდენობა, ყველა სხვა პარამეტრი შემცირებულია. დღევანდელი მდგომარეობიდან გამომდინარე, ქვეყანა ინფიცირების სტაბილურ რიცხვს აჩვენებს. მოსალოდნელია, რომ შემდეგი დღეების განმავლობაში კიდევ უფრო მეტად შემცირდეს. ერთადერთი რისკი, რაც არამხოლოდ საქართველოს, არამედ სხვა ქვეყნებს აქვთ, არის ახალი ვარიანტის გამოჩენა, რომელმაც შესაძლოა, რადიკალურად შეცვალოს მდგომარეობა.

უნდა აღვნიშნო, რომ ევროპის რამდენიმე ქვეყანაში ახლა არის ინფიცირების პიკური მაჩვენებელი. ინფიცირებულთა მაქსიმალური რაოდენობა ფიქსირდება ისეთ ქვეყნებში, როგორიც არის გერმანია, სამხრეთ კორეა, ჰონგ - კონგი. ძალიან ნაადრევია იმაზე საუბარი, რომ საქართველოში არსებული მდგომარეობა მსოფლიოში პანდემიის დასასრულის პერიოდზე მიუთითებს. ჯერ მაინც უნდა დაველოდოთ შემდეგ თვეებს“, -აღნიშნავს ჩხაიძე.

მან იმუნიზაციის პროცესზეც ისაუბრა და აღნიშნა, რომ იმუნიზაციის პროცესში წყვეტა არ იქნება.

„პირველი აპრილიდან საქართველოში „ფაიზერის“ ვაქცინის ახალი პარტია იქნება. ვაქცინაციის პროცესში წყვეტა არ იქნება. გულდასაწყვეტია, რომ მსოფლიოში საუკეთესო ვაქცინის გამოუყენებელი დოზა დაგვრჩება. ვაქცინაციის პროცესი შეუფერხებლად მიმდინარეობს“, - განაცხადა ივანე ჩხაიძე მედიაცენტრ „მთავარში“.