რუსეთის თავდაცვის სამინისტროს განცხადებით, რუსი სამხედროები პარასკევს, საფრანგეთისა და გერმანიის ლიდერების თხოვნის საფუძველზე, ალყაში მოქცეულ ქალაქ მარიუპოლიდან ზაპოროჟიეს მიმართულებით საევაკუაციო დერეფანს განაახლებენ.
„რუსეთის ფედერაციის პრეზიდენტ ვლადიმერ პუტინის მიმართ საფრანგეთის პრეზიდენტის, ემანუელ მაკრონისა და გერმანიის ფედერალური კანცლერის, ოლაფ შოლცის პირადი მოთხოვნით, 1-ელ აპრილს 10:00 საათიდან (მოსკოვის დროით). რუსეთის შეიარაღებული ძალები დერეფანს გახსნიან,”- აღნიშნულია სამინისტროს განცხადებაში.
მათივე ინფორმაციით, ევაკუაციის პროცესი გაეროსა და „წითელი ჯვრის“ წარმომადგენლების მონაწილეობით განხორციელდება.
„ამ ჰუმანიტარული ოპერაციის წარმატებით განსახორციელებლად, შემოთავაზებულია მისი ჩატარება გაეროს ლტოლვილთა უმაღლესი კომისრისა და წითელი ჯვრის საერთაშორისო კომიტეტის წარმომადგენლების უშუალო მონაწილეობით“, - ნათქვამია რუსეთის თავდაცვის უწყების განცხადებაში.