პროკურორ ლევან ვეფხვაძის განცხადებით, ბრალდების მხარე გაასაჩივრებს თბილისის საქალაქო სასამართლოს გადაწყვეტილებას, რომლის მიხედვითაც, ჟურნალისტებზე ფიზიკური ძალადობისთვის ბრალდებულ პირებს ორგანიზებული ჯგუფური ძალადობა არ დაუდასტურდათ.

ლევან ვეფხვაძის თქმით, ბრალდების მხარეს მიაჩნდა და მიაჩნია, რომ ბრალდებულების მიერ ჩადენილი დანაშაულებრივი ქმედება იყო ჟურნალისტების მიმართ განხორციელებული ორგანიზებული ჯგუფური ძალადობა მათივე საქმიანობიდან გამომდინარე და ასევე დევნა. ამიტომ, პროკურორი თვლის, რომ ამ ნაწილში სასამართლოს განაჩენი დაუსაბუთებელია. ამასთან, პროკურორი სასამართლოს სასჯელის ნაწილშიც არ ეთანხმება.

„მოვისმინეთ სასამართლოს გადაწყვეტილება და იმდენად კატეგორიულად ვეწინააღმდეგებით აღნიშნულ გადაწყვეტილებას, რომ აბსოლუტურად არასწორად მიღებულ გადაწყვეტილებად მიგვაჩნია. არც კვალიფიკაციის და არც სასჯელის ნაწილში არ ვეთანხმებით.

ბრალდების მხარეს წარდგენილი ჰქონდა მტკიცებულებები, რომელიც ორგანიზებულ ჯგუფურ ძალადობაში მონაწილეობას ადასტურებდა.

სასამართლომ მუხლი გადააკვალიფიცირა და თქვა, რომ სასამართლო ეტაპზე ორგანიზებული ჯგუფური ძალადობა ვერ დადასტურდა. ბრალდების მხარე აღნიშნულ განაჩენს კატეგორიულად ეწინააღმდეგება და კანონით დადგენილ ვადებში გავასაჩივრებთ, როგორც კვალიფიკაციის ისე სასჯელის ნაწილში ყველა ბრალდებულის მიმართ", - განაცხადა ლევან ვეფხვაძემ.