დავით უსუფაშვილი - ხელისუფლებამ ისიც კი ვერ ამოთქვა, რა სანქციებს ვართ რეალურად შეერთებული, ისიც ვერ თქვა, რომ პირველები ვიყავით, ვინც დიპლომატიური ურთიერთობა გაწყვიტა რუსეთთან - ესეც ვერ მიიტანეს მსოფლიომდე

სამწუხაროდ, არ ველი კარგ დასკვნებს იმ ფონზე, რაც ბოლო წლებში მოხდა საქართველოში, მარტო შარლ მიშელის დოკუმენტის დახევა და გადაგდება რად ღირს, - ასე ეხმიანება „ლელოს" დეპუტატი დავით უსუფაშვილი ჟურნალისტებთან ევროპარლამენტის მიერ გამოქვეყნებულ დოკუმენტს.

მისი თქმით, ბოლო პერიოდში განვითარებული მოვლენები საქართველოში არ აღძრავს ენთუზიაზმს ევროკავშირში საქართველოს დემოკრატიისა და ინტეგრაციის მზაობის ხარისხზე.

„ეს არის ძალიან მნიშვნელოვანი უწყების დასკვნა, რომელსაც ევროპარლამენტი უმეტეს შემთხვევაში პრაქტიკულად იზიარებს ხოლმე. მე სამწუხაროდ, არ ველი კარგ დასკვნებს იმ ფონზე, რაც ბოლო წლებში მოხდა საქართველოში, მარტო შარლ მიშელის დოკუმენტის დახევა და გადაგდება რად ღირს, როცა საქართველო წარმოჩნდა ისეთ ქვეყნად, რომელსაც ვერ აუწყვია შიდა საქმეები და შარლ მიშელის ვიზიტები ხდება საჭირო, რომ ელემენტარულ რეფორმებზე შევთანხმდეთ ხოლმე აქ, მერე ამდენი წვალების შემდეგ მიღწეული შეთანხმება, რომელიც ხელისუფლებამ მარტივად გადააგდო, გავიხსენოთ უარი ევროკავშირისგან კრედიტზე, ეს ყველაფერი ევროკავშირში არ აღძრავს ენთუზიაზმს ჩვენი დემოკრატიის ხარისხსა და მზაობის ხარისხზე. თუმცა, ბოლო ტრაგიკულმა მოვლენებმა გააჩინა სერიოზული ფანჯარა და ამაზე საჭიროა სერიოზული მუშაობა. მარტო განაცხადის გაგზავნა არაფერს ნიშნავს, მოქმედებებით უნდა დადასტურდეს, რომ საქართველო მიჰყვება ევროპულ პრინციპებს და ღირებულებებს",- განაცხადა უსუფაშვილმა.

დეპუტატი ასევე გამოეხმაურა დოკუმენტში სანქციების თაობაზე არსებულ ჩანაწერს და აღნიშნა, რომ საქართველომ ამ საკითხთან დაკავშირებით თავის არაკვალიფიციურობით წააგო პირველ რიგში მსოფლიო მასშტაბით. უსუფაშვილის განცხადებით, ქვეყნის საერთაშორისო იმიჯი ზიანდება და ეს მას არ სიამოვნებს, მიუხედავად იმისა, თუ რა წარმოდგენა აქვს მთავრობაზე.

„ისიც კი ვერ ამოთქვა, თუ რა სანქციებს ვართ რეალურად შეერთებული და ისიც ვერ თქვა, რომ პირველები ვიყავით ვინც დიპლომატიური ურთიერთობა გაწყვიტა რუსეთთან და ასეთ მძიმე დღეში ვართ, ესეც ვერ მიიტანეს მსოფლიომდე, ვერ ახსნეს, რომ თუ რაიმე სანქციაზე უარის თქმა იყო აუცილებელი, რომ ერთადერთი პოზიცია კი არ გვაქვს - არა სანქციებს, არამედ ბევრი რამ გვაქვს კიდევ,"- განაცხადა უსუფაშვილმა.

ცნობისთვის, ევროპარლამენტმა გამოაქვეყნა ანგარიში, რომელიც ევროკავშირი-საქართველოს ასოცირების შეთანხმების შესრულებას ეხება და 2020-2022 წლებს მოიცავს. ანგარიშის თანახმად, 2020 წლიდან საქართველომ სერიოზულად დაიხია უკან დემოკრატიული პრინციპებისა და იმ ძირითადი პოლიტიკური ვალდებულებების კუთხით, რომლებიც მან ასოცირების შეთანხმების ფარგლებში აიღო.

დოკუმენტში აღნიშნულია, რომ „მკვეთრი პოლიტიკური პოლარიზაციის კონტექსტში, დემოკრატიული ინსტიტუტები თანდათან კარგავენ საკუთარ არსს და მმართველი კოალიცია სულ უფრო მეტად ახორციელებს ძალაუფლებას ხელში ჩაგდების კონცენტრირებას, ამასთანავე ზღუდავს სივრცეს განსხვავებული აზრისთვის“. ანგარიშში ხაზგასმულია, რომ ქვეყანაში კანონის უზენაესობა მნიშვნელოვნად გაუარესდა.

ლევან შენგელია - მხოლოდ რუსეთის ფუნდამენტურმა დამარცხებამ უკრაინასთან და მთლიანად დასავლეთთან დაპირისპირებაში შეიძლება აგვაცილოს თავიდან ცუდი მომავალი
გრიგორი კუკურუზა - ომით მიყენებული ზარალი დაახლოებით 1,1-1,2 ტრილიონ აშშ დოლარს შეადგენს - უკრაინას იმედი აქვს, რომ ქვეყნის აღსადგენად სახსრებს აგრესორი რუსეთისგან მიიღებს
ქართული პრესის მიმოხილვა 24.11.2022
რეალური შავი პარასკევი „ჰუალინგ პლაზაში“ – გაიგეთ შეთავაზების დეტალები
„სმარტ კაპიტალმა“ ედიშერ და გიგი გარაყანიძეების სახელობის სტიპენდიატები დააჯილდოვა
პეტროკას ენერჯი ჯგუფი და სანპეტროლიუმ ჯორჯია განცხადებას ავრცელებენ
„ბიბლუსში“ Black Friday დაიწყო - 50%-იანი ფასდაკლება მხოლოდ ვებგვერდზე შოპინგისას
500-მდე პარტნიორი კომპანია და 100%-იანი ზრდის პერსპექტივა - „არომაკო“ 2-წლიან საქმიანობას აჯამებს
11 000 ლარამდე ფასდაკლება „ტერასა რეზორთ ბაკურიანის“ პრემიუმ კლასის სასტუმროს ნომრებზე 30 ნოემბერს სრულდება
ბაზისბანკის მხარდაჭერით ქუთაისში Hill Hotel Kutaisi გაიხსნა
„მრავალი ხმა, ერთი სამშობლო“ – კამპანია, რომელიც განსხვავებულ ადამიანებს აერთიანებს