ქალაქ ბუჩას მერმა, ანატოლი ფედორუკმა, BBC-ს განუცხადა, რომ რუსმა ჯარისკაცებმა ოკუპაციის პერიოდში ქალაქში 320 მშვიდობიანი მოქალაქე მოკლეს.
ანატოლი ფედორუკის თქმით, ის პირადად შეესწრო რუსი სამხედროების მიერ ადამიანების სიკვდილით დასჯის ფაქტებს.
„რამდენიმე ეპიზოდი ვნახე. სამი სამოქალაქო მანქანა ევაკუაციას კიევისკენ ცდილობდა, ისინი სასტიკად დახვრიტეს. ვნახე ორსული ქალი, რომლის ქმარი ყვიროდა, სთხოვდა მათ, რომ არ ესროლათ მისთვის, მაგრამ მათ ორსული ქალი უბრალოდ სასტიკად დახვრიტეს“, - განაცხადა ფედორუკმა.
ბუჩას მერმა აგრეთვე აღნიშნა, რომ რუსული ძალები ოკუპაციის დროს ადგილობრივ პოლიტიკოსებზე ნადირობდნენ.
ფედორუკმა რუსეთის საგარეო საქმეთა მინისტრ სერგეი ლავროვს, რომელმაც უარყო რუსი სამხედროების მიერ ომის დანაშაულების ჩადენის ბრალდებები, მოუწოდა, რომ „ჩასულიყო ქალაქ ბუჩაში, ენახა დაღუპულთა ცხედრები და თვალებში ჩაეხედა მათი ოჯახებისთვის - დედებისთვის, ქმრებისთვის, ბავშვებისთვის, რომლებიც დაობლდნენ“.