ამერიკის შეერთებული შტატები არ მიიღებს მონაწილეობას „დიდი ოცეულის“ შეხვედრებში, რომლებშიც რუსეთი მონაწილეობს, - ამის შესახებ დღეს აშშ-ის ხაზინის დეპარტამენტის (ფინანსთა სამინისტროს) მდივანმა ჯანეტ იელენმა განაცხადა.

აშშ-ის წარმომადგენელთა პალატის ფინანსური მომსახურების კომიტეტში საუბრისას იელენმა აღნიშნა, რომ მან ეს პოზიცია ნათლად განუცხადა „დიდი ოცეულის“ სხვა ფინანსთა მინისტრებს.

„მე ნათლად ვუთხარი ჩემს კოლეგებს, რომ ჩვენ არ მივიღებთ მონაწილეობას რიგ შეხვედრებში, თუ რუსები იქ იქნებიან” , - დასძინა მან.

შეგახსენებთ, აშშ-ის პრეზიდენტმა ჯო ბაიდენმა გასულ თვეს, ბრიუსელში გამართულ პრესკონფერენციაზე განაცხადა, რომ რუსეთი უნდა გარიცხონ „დიდი ოცეულიდან“.

ცნობისთვის, „დიდი ოცეულის“ ლიდერების შემდეგი სამიტი ნოემბერში ინდონეზიაში გაიმართება. ამ შეკრების წინ კი მინისტრთა შეხვედრებია დაგეგმილი.