უკრაინის პრემიერ-მინისტრმა დენის შმიგალმა რუსეთი ომის დროს უკრაინელების წინააღმდეგ გენოციდის განხორციელებაში დაადანაშაულა. ინფორმაციას BBC ავრცელებს.

შმიგალის თქმით, ის "აბსოლუტურად დარწმუნებულია, რომ ეს არის გენოციდი უკრაინელი ერის წინააღმდეგ რუსეთის მხრიდან".

უკრაინის პრემიერმა მოუწოდა დასავლეთს, შეწყვიტოს რუსული ნავთობისა და გაზის ყიდვა და დასძინა, რომ აღნიშნული ფული რუსეთის მიერ „ამ გენოციდის“ და დანაშაულების დასაფინანსებლად გამოიყენება.

“რუსეთის ბიუჯეტი არის ტერორიზმის ბიუჯეტი და არა მხოლოდ უკრაინის, არამედ მთელი ცივილიზებული სამყაროს წინააღმდეგ”, - დასძინა მან.

“ეს სისხლის ფულია, რადგან ამ ფულს იყენებენ იარაღის შესაძენად, საიდანაც უკრაინელებს კლავენ” , - აღნიშნა უკრაინის პრემიერმა.