რელიგიის საკითხთა სახელმწიფო სააგენტო საქართველოს ბაპტისტურ ეკლესიას ხარების დღესასწაულს ულოცავს.
ამის შესახებ რელიგიის საკითხთა სახელმწიფო სააგენტო განცხადებას ავრცელებს, სადაც აღნიშნულია, რომ ქრისტოლოგიაში ხარება კაცობრიობის ხსნის დასაწყისად ითვლება.
„საქართველოს ბაპტისტური ეკლესია დღეს ხარებას დღესასწაულობს. ქრისტოლოგიაში ხარება კაცობრიობის ხსნის დასაწყისად და საუკუნეების მანძილზე დაფარული ღვთის საიდუმლოს გამოცხადების დღესასწაულად ითვლება. სახარების მიხედვით, სწორედ ამ დღეს ახარა გაბრიელ მთავარანგელოზმა ქალწულ მარიამს, რომ ის მაცხოვარს შობდა.
რელიგიის საკითხთა სახელმწიფო სააგენტო ულოცავს საქართველოს ბაპტისტურ ეკლესიასა და მის მრევლს ღვთისმშობლის ხარების დღესასწაულს“,- ნათქვამია ინფორმაციაში.