მიხეილ ხიდურელი - ექსპორტის სტიმულირების ახალი პროგრამა ხელს შეუწყობს საექსპორტო ბაზრების დივერსიფიკაციას

„ჩვენი სააგენტოს ფარგლებში კიდევ ერთი ახალი - ექსპორტის სტიმულირების პროგრამა ჩავუშვით, რომელიც ხელს შეუწყობს ბაზრების დივერსიფიცირებას, ახალ ბაზრებზე შესვლას და ქართული პროდუქტის საერთაშორისო ქსელებში მოხვედრას,“ - ამის შესახებ სააგენტოს „აწარმოე საქართველოში“ დირექტორმა მიხეილ ხიდურელმა განაცხადა.

მისივე თქმით, ამ ახალი მექანიზმით შეივსება ყველა ის პროგრამა, რომელიც მსოფლიო პრაქტიკით ხორციელდება ექსპორტის მხარდამჭერ სააგენტოებში.

„ჩვენთვის ძალიან მნიშვნელოვანია და ყოველთვის აქტიურად ვმუშაობდით ბაზრების დივერსიფიცირებაზე. ექსპორტის სტიმულირების ახალი პროგრამა, ფაქტობრივად ფაზლის ბოლო ნაწილია, რომლითაც შეგვიძლია ვთქვათ, რომ ექსპორტიორებს ჩვენი სააგენტოს მეშვეობით დახმარების სრული პაკეტი აქვთ. კონკრეტულად, ჩვენი ახალი პროგრამა სამ ძირითად კომპონენტს აერთიანებს. პირველი - ეს არის საწარმოების სერტიფიცირება და პროდუქტის ლიცენზირება, რაც არის უმნიშვნელოვანესი ექსპორტიორებისთვის. მეორე - ეს არის უცხოურ ბაზრებზე, ქვეყნის მსხვილ სუპერმარკეტებში შესვლის თანადაფინანსება, რაც საკმაოდ დიდ სირთულეებთან და ხარჯებთან არის დაკავშირებული და შესაბამისად, 10 000 ევროიანი გრანტი გვექნება ექსპორტიორებისთვის ამ ნაწილში. მესამე - ეს არის ბრენდინგი და შეფუთვა, რაც უცილებელი კომპონენტია, რომ პროდუქტი იყოს მზადყოფნაში, ნებისმიერ ბაზარზე გასასვლელად“, - აღნიშნა მიხეილ ხიდურელმა.

მისივე თქმით, სააგენტო „აწარმოე საქართველოში“ სხვა კომპონენტების მეშვეობითაც აქტიურ დახმარებას უწევს კომპანიებს, რომ გახდნენ ექსპორტიორები. მაგალითად, სააგენტო კომპანიებს საშუალებას აძლევს მონაწილეობა მიიღონ საერთაშორისო გამოფენებში, ასევე სთავაზობს ექსპორტის მენეჯერთა ტრენინგის კურსებს და სხვა.

ექსპორტის სტიმულირების პროგრამაში მონაწილეობის მსურველებმა განაცხადები უნდა გამოაგზავნონ ქვეყნის ექსპორტიორთა პლატფორმაზე: www.tradewithgeorgia.com მიმდინარე წლის 7 აპრილიდან 10 მაისის ჩათვლით.

ბადრი ბელქანია - უკრაინაში რუსეთის წინააღმდეგ ქართველები სოლიდარობის გარდა იმის გამოც იბრძვიან, რომ მათთვის ამ ომში რუსეთის მარცხი არის შესაძლებლობა საკუთარი ხალხის ბრძოლას დაეხმარონ
ქართული პრესის მიმოხილვა 05.12.2022
კახა გოგოლაშვილი - ევროპარლამენტი საქართველოს ევროკავშირში ინტეგრაციის შესაძლებლობას ზრდის, ახლა ჯერი ჩვენზეა
კახა ოქრიაშვილი: „ოცნებას“ უკრაინაში გამარჯვების შემდეგ ქართველი პატრიოტების საქართველოში დაბრუნების ეშინია!“
ახალი შესაძლებლობა IT სფეროს წარმომადგენლებისთვის - "Devexperts" უკვე საქართველოშია
2022 წლის საუკეთესო ამერიკული არქიტექტორული კომპანია ბათუმის ხელოვნურ კუნძულზე შენობას დააპროექტებს
როგორ შევარჩიოთ საახალწლო საჩუქარი