რუსეთის ფედერაციის ხელმძღვანელობას გამიზნული ჰქონდა უკრაინის ნაწილებად დაშლა, თავისთვის წაიღებდა იმდენ ტერიტორიას, რამდენსაც შეძლებდა, ხოლო დანარჩენს მაქსიმალურად დაასუსტებდა და დაანგრევდა. ამის შესახებ უკრაინის პრეზიდენტმა ვოლოდიმირ ზელენსკიმ კვიპროსის პარლამენტის წინაშე დღევანდელი გამოსვლისას განაცხადა.

მისი აზრით, რუსეთის მიზანი იყო, შეექმნა ახალი დაყოფა ევროპაში, რომელიც უპასუხებდა მისი ხელმძღვანელობის არაადეკვატურ ამბიციებს.

ამასთან, ზელენსკის თქმით, რუსეთის ხელისუფლება არაფრად აგდებს სახელმწიფოთა უმეტესობას და ხალხებს.

„უკრაინას ისინი განიხილავენ იმ ჯგუფში, ვისი დაჯაბნვაც უნდათ. ამიტომაც მოვიდა რუსეთი ჩვენთან ომით. ყველა სახელმწიფო უნდა დაფიქრდეს, რომელ ჯგუფს განაკუთვნებენ მათ და რა არის სინამდვილეში ჩადებული რუსეთის პოლიტიკის საძირკველში მათთან მიმართებით”, - განაცხადა ზელენსკიმ.