უკრაინის პრეზიდენტი ვოლოდიმირ ზელენსკი, უკრაინაში ვიზიტით მყოფ, სლოვაკეთის რესპუბლიკის პრემიერ-მინისტრ ედუარდ ჰეგერს შეხვდა, - ამის შესახებ ინფორმაციას უკრაინის პრეზიდენტის ადმინისტრაცია ავრცელებს. მათივე ინფორმაციით, უკრაინის პრეზიდენტმა სლოვაკ ხალხსა და პირადად სლოვაკეთის პრემიერ-მინისტრს, უკრაინის მხარდაჭერისთვის და რეალური დახმარებისთვის, მადლობა გადაუხადა.

„მინდა, სლოვაკ ხალხსა და სლოვაკეთის პრემიერ-მინისტრს მადლობა გადავუხადო არა მომავლისთვის, არამედ აწმყოსთვის, იმისათვის, რასაც ისინი ჩვენთვის, ომის განმავლობაში აკეთებენ. სრულად უჭერენ მხარს ჩვენს პოზიციას, რუსეთის დაგმობაში, არა მხოლოდ სიტყვებით, არამედ საქმით", - განაცხადა ზელენსკიმ. ადმინისტრაციის ინფორმაციით, ზელენსკიმ აღნიშნა, რომ მხარდაჭერის დეტალებს ვერ გაამჟღავნებს და ხაზგასმით აღნიშნა, რომ ეს იყო ისტორიულად მნიშვნელოვანი დახმარება.