რუსი სამხედროები აღმოსავლეთ უკრაინაში გადაჯგუფდებიან და ხარკოვისკენ წინსვლას გეგმავენ, - ამის შესახებ უკრაინის სამხედრო დაზვერვის ხელმძღვანელმა, გენერალ-მაიორმა კირილ ბუდანოვმა CNN-ს განუცხადა.

"ისინი გადაჯგუფდებიან ქალაქ იზიუმისკენ ბელგოროდის გავლით. შეჰყავთ დამატებითი ჯარი ბელგოროდში, რათა აანაზღაურონ დანაკარგები უკრაინაში. პირველ რიგში ხარკოვისკენ წინსვლას გეგმავენ. შეეცდებიან ქალაქი მარიუპოლის ბოლომდე აღებას და მხოლოდ ამის შემდეგ შეეცდებიან წინსვლას კიევისკენ", - - განაცხადა კირილო ბუდანოვმა.

მან უკრაინის მოკავშირეებს მოუწოდა, უზრუნველყონ "ნამდვილად სერიოზული" სამხედრო მხარდაჭერა, რათა დაეხმარონ მას რუსეთის თავდასხმის წინააღმდეგ ბრძოლაში. მისი თქმით, უკრაინას სჭირდება მძიმე არტილერია, საზენიტო-სარაკეტო სისტემები და საბრძოლო თვითმფრინავები.

„უკრაინას ნამდვილად სჭირდება სერიოზული მხარდაჭერა მძიმე შეიარაღებაში და ჩვენ გვჭირდება ის არა ხვალ, არამედ დღესვე“, - განაცხადა უკრაინის სამხედრო დაზვერვის ხელმძღვანელმა.