ავსტრია სამხედრო კუთხით ნეიტრალური ქვეყანაა, მაგრამ ჩვენ გვესმის, რომ უნდა დავეხმაროთ მათ, სადაც უსამართლობა და ომის დანაშაულებები ხდება, - ამის შესახებ დღეს ავსტრიის კანცლერმა კარლ ნეჰამერმა კიევში უკრაინის პრეზიდენტ ვოლოდიმირ ზელენსკისთან შეხვედრის შემდეგ გამართულ ერთობლივ პრესკონფერენციაზე განაცხადა.

მისივე თქმით, ავსტრია მხარს უჭერს ევროკავშირის სანქციებს რუსეთის წინააღმდეგ და ბლოკი მზადაა დააწესოს უფრო მეტი სანქცია. ნეჰამერი დღესვე ქალაქ ბუჩასაც ეწვევა, რომელსაც მან "ომის დანაშაულების ადგილი" უწოდა.

“ჩვენ უნდა გავაცნოთ ეს ომის დანაშაულები გაეროს და საერთაშორისო მართლმსაჯულებამ უნდა დაიწყოს გამოძიება და ებრძოლოს ამ დანაშაულებებს,” - აღნიშნა ავსტრიის კანცლერმა.

ზელენსკიმ ნეჰამერს მადლობა გადაუხადა იმ მხარდაჭერისთვის, რომელიც უკრაინამ აქამდე მიიღო და კიდევ ერთხელ გაიმეორა რუსეთის წინააღმდეგ სანქციების დაწესების მოთხოვნა.