რუსეთი არ ცვლის სტრატეგიას, რომელიც მიმართულია მშვიდობიან მოქალაქეებზე თავდასხმისკენ და ეს არის ის, რამაც დასავლური სამყაროს მობილიზება უნდა გამოიწვიოს, რადგან ეს მიუღებელია 21-ე საუკუნეში, - ამის შესახებ საქართველოს პრეზიდენტმა სალომე ზურაბიშვილმა MSNBS-თან ინტერვიუში განაცხადა.
„ასეთი სახის ომი მიუღებელია, ბუჩა მიუღებელია 21-ე საუკუნეში, კრამატორსკი მიუღებელია 21-ე საუკუნეში. ამან უნდა გააერთიანოს ყველა ადამიანი, ვინც იზიარებს დემოკრატიულ ღირებულებებს მსოფლიოში. ეს თქვენი, ჩემი საქმეა და ჩვენ ყველა ერთიანი ვართ ამ ღირებულებების დაცვაში“, – განაცხადა პრეზიდენტმა ზურაბიშვილმა.
ამასთან, სალომე ზურაბიშვილის განცხადებით, გზა, რომელსაც რუსეთი იყენებს მეზობელ ქვეყნებში შესაჭრელად, მსგავსია.
„მსგავსება არ არის ქვეყნების ზომებში, ქვეყნების რესურსებში. ის გამძლეობა, რომელსაც უკრაინა იჩენს, მიუხედავად რუსეთის სასტიკი აგრესიისა, არის ის, რაც აღგვაფრთოვანებს ყველას. ჩენი ქვეყნების ზომები ერთმანეთს არ შეედრება, მაგრამ ბრძოლა, რომელსაც ახლა უკრაინელები უძღვებიან, არ არის მხოლოდ თავიანთი ბრძოლა დამოუკიდებლობისთვის, არამედ ეს არის ბრძოლა ჩვენთვისაც. ასევე, ბრძოლა შავი ზღვის უსაფრთოხებისა და თავისუფლებისთვის, ევროპის დიდი ნაწილის უსაფრთხოებისა და თავისუფლებისთვის. ეს არის ის, რაც ყველას უნდა გვახსოვდეს“, – განაცხადა სალომე ზურაბიშვილმა.