ერთი მხრივ, ახალ კონტაქტებში შემცირებული საწვავის ფასები და მეორეს მხრივ, შედარებით დასტაბილურებული ლარის კურსი აჩენს იმის მოლოდინს, რომ საწვავის ფასების კორექტირება უნდა მოხდეს შემცირების მიმართულებით, - ამის შესახებ ფინანსთა მინისტრმა, ლაშა ხუციშვილმა მთავრობის სხდომის დასრულების შემდეგ გამართულ ბრიფინგზე განაცხადა.

მინისტრის თქმით, საწვავის ხარისხის ინდიკატორის შემოწმება აქამდეც ხდებოდა და მომავალშიც გაგრძელდება.

"ბუნებრივია, ფასების ინდიკატორი არის გარკვეულწილად ის კონტრაქტები, რომელიც სამომავლო პერიოდში მოსაწოდებელ საწვავთან მიმართებაში იდება. ამ კონტრაქტებზე ფასები არის შემცირებული ვიდრე ეს იყო თებერვალში, როდესაც ფასმა საერთაშორისო ბაზრებზე ისტორიულ მაქსიმუმს მიაღწია. ასევე ბუნებრივია, გარკვეულწილად ვალუტის კურსიც ახდენს შესაბამის კორექტირებას, თუმცა ამ მიმართულებითაც ვხედავთ, რომ გარკვეულწილად სტაბილურობა შეინიშნება და ბუნებრივია, ეს ყველაფერი საბოლოოდ, საწვავის სარეალიზაციო ფასზე ასახვას პოვებს. ერთი მხრივ, ახალ კონტაქტებში შემცირებული საწვავის ფასები და მეორეს მხრივ, შედარებით დასტაბილურებული ლარის კურსი აჩენს იმის მოლოდინს, რომ საწვავის ფასების კორექტირება უნდა მოხდეს შემცირების მიმართულებით," - განაცხადა ლაშა ხუციშვილმა.