ოკუპირებული სამხრეთ ოსეთის ე.წ. ცენტრალურმა საარჩევნო კომისიამ მარიონეტული რეჟიმის ე.წ. საპრეზიდენტო არჩევნების მეორე ტური გამოაცხადა. აღნიშნულ ინფორმაციას „რია ნოვოსტი“ ავრცელებს.

„ცენტრალური საარჩევნო კომისია სამხრეთ ოსეთის საპრეზიდენტო არჩევნების მეორე ტურში ორ რეგისტრირებულ კანდიდატს დაუშვებს, რომლებმაც ყველაზე მეტი ხმა მიიღეს“, - განაცხადეს ე.წ. ცენტრალურ საარჩევნო კომისიაში.

ცხინვალის მარიონეტული რეჟიმის ე.წ. საპრეზიდენტო არჩევნებში ხმების 95%-ის დათვლის შემდეგ, მოქმედ ე.წ. პრეზიდენტს, ანატოლი ბიბილოვს 33,5% აქვს, მას ალან გაგლოევი ხმების 36,9%-ით უსწრებს.

ბიულეტენების 95%-ის დათვლის შემდეგ, მესამე ადგილზე გავიდა ალექსანდრ პლიევი, რომელმაც მიიღო ხმების 11,9%, მეოთხეზე არის გარი მულდაროვი 8,9%-ით და დიმიტრი ტასოევი 2,8%-ით, ხოლო 1,8%-მა ხმა მისცა ყველას წინააღმდეგ.

ოკუპირებული სამხრეთ ოსეთის ე.წ. ცესკო-ს ცნობით, მეორე ტური გაიმართება საერთო არჩევნების შედეგების დადგენიდან არაუგვიანეს 15 დღისა.

ცნობისთვის, ოკუპირებული სამხრეთ ოსეთის ე.წ. საპრეზიდენტო არჩევნებში საბოლოო აქტივობამ 82,07% შეადგინა.