ისრაელთან დაძაბულობის ფონზე, პალესტინელებმა დააზიანეს აკლდამა, სადაც ბიბლიური ფიგურა იოსები განისვენებს. ინფორმაციას BBC-ი ავრცელებს.
არსებული ცნობებით, ინციდენტი შაბათს ღამით ოკუპირებულ დასავლეთ სანაპიროზე, ნაბლუსში მოხდა.
ვანდალურ აქტს ისრაელის პრემიერ-მინისტრმა ნაფტალი ბენეტმა "განადგურების სიგიჟე" უწოდა და მტკიცე პასუხის პირობა დადო.
სოციალურ ქსელებში გავრცელებულ ვიდეოში ასახულია, რომ პალესტინელები საფლავზე ჩამოკიდებულ დიდ განათებას ურტყამენ და აკლდამის ქვის სახურავს აზიანებენ. ისრაელის საგარეო საქმეთა სამინისტროს მიერ გავრცელებულ ვიდეოში კი ასახულია ხანძრის შედეგად დაზიანებული აკლდამა. დამნაშავეები პალესტინის უსაფრთხოების ძალებმა დააკავეს.
როგორც უცხოური მედია წერს, აღნიშნული ინციდენტი განსაკუთრებით მგრძნობიარე დროს მოხდა - ებრაულები რამდენიმე დღეში პასექის დღესასწაულს იზეიმებენ.