მედია - ჩრდილოეთ კორეის საგარეო საქმეთა მინისტრმა გაეროს ადამიანის უფლებათა საბჭოში რუსეთისთვის წევრობის შეჩერება დაგმო და მას „არაგონივრული ქმედება“ უწოდა

ჩრდილოეთ კორეის საგარეო საქმეთა მინისტრმა რუსეთისთვის გაეროს ადამიანის უფლებათა საბჭოში წევრობის შეჩერება დაგმო და მას „არაგონივრული ქმედება“ უწოდა, რომელსაც შეერთებული შტატები და დასავლეთი ხელმძღვანელობენ პოლიტიკური ჰეგემონიის შესანარჩუნებლად. ინფორმაციას „როიტერსი“ ავრცელებს.

ჩრდილო კორეელმა მინისტრმა, რომლის ვინაობასაც ქვეყნის სახელმწიფო საინფორმაციო სააგენტო KCNA არ ასახელებს, შეერთებული შტატები დამოუკიდებელი ქვეყნების იზოლირებაში დაადანაშაულა, რათა აშშ-მ „უკანონო და არაადამიანური ჰეგემონური წესრიგი“ შეინარჩუნოს.

გარდა ამისა, მინისტრმა დასძინა, რომ საერთაშორისო ორგანიზაციები არ უნდა იყოს „ბოროტად გამოყენებული“, როგორც შეერთებული შტატების მიერ ქვეყნებზე პოლიტიკური ზეწოლის განხორციელების საშუალება.

შეგახსენებთ, 7 აპრილს გაეროს გენერალური ასამბლეის სხდომაზე 93-მა წევრმა მხარი დაუჭირა რუსეთისთვის ადამიანის უფლებათა საბჭოში წევრობის შეჩერებას. აღნიშნული რეზოლუციის წინააღმდეგ ხმა 24-მა ქვეყანამ მისცა, ხოლო 58-მა თავი შეიკავა.

ჩრდილოეთ კორეა, ჩინეთი, კუბა, ირანი, სირია, ვიეტნამი და თავად რუსეთი იმ სახელმწიფოებს შორის იყვნენ, ვინც რეზოლუციის წინააღმდეგ წავიდნენ.

ემილ ავდალიანი - არაბული ქვეყნებისთვის და ირანისთვის ახლო აღმოსავლეთის რეგიონთან ჩინეთის ურთიერთობის სუფთა წარსული მეტად მიმზიდველია
ქართული პრესის მიმოხილვა 28.03.2024
საქართველოს თავდაცვის დილემა - რთული არჩევანი რთულ ვითარებაში
ამერიკული სამედიცინო ჰოლდინგი - CooperSurgical-ი საქართველოში ოვამედის ორგანიზებით სამდღიან სემინარს მართავს