თბილისის საკრებულოსთან მოძრაობა "ტალღას" წევრებმა აქცია გამართეს. აქციის მონაწილეები მთავრობის გადადგომას ითხოვენ და აცხადებენ, რომ მათი მოძრაობა მალე ძალიან ფართო გახდება და დაიწყებენ კომუნიკაციას პოლიტიკოსებთან და არასამთავრობო ორგანიზაციებთანაც.
"ეს არის ახალი მოძრაობა - "ტალღა", რომლის სლოგანიც არის "გადადგები". ყველაფერი მიმართულია იქითკენ, რომ გადადგეს ეს მთავრობა, თუმცა გადადგომის მერე შემდეგი ნაბიჯებიც ჯგუფთან ერთად უნდა გავარკვიოთ, თუ რა გვინდა. გადადგომას აუცილებლად მივაღწევთ, ხვალ და ზეგ შეიძლება არა, მაგრამ მზარდი საპროტესტო ტალღით გადადგომა მიიღწევა და შემდეგი ეტაპი იქნება როგორ უნდა განვითარდეთ, არჩევნები როგორი უნდა იყოს. ვესაუბრებით ოპოზიციურ პარტიებს, ვესაუბრებით არასამთავრობო ორგანიზაციებს", - განაცხადა მოძრაობის ერთ-ერთმა ლიდერმა, ნატა ფერაძემ.