უკრაინა თავს უფლებას ვერ მისცემს, სათანადოდ არ შეაფასოს მტერი და მზად არის, ომის მსვლელობის ნებისმიერი სცენარისთვის. ამის შესახებ უკრაინის თავდაცვის მინისტრის მოადგილემ ანა მალიარმა განაცხადა.

„ჩვენ სათანადოდ უნდა შევაფასოთ მტერი, რუსეთის არმია. ის საბოლოო ჯამში, რიცხოვნობით მეტია, შეიარაღებულია დიდი ოდენობით სამხედრო ტექნიკით და ამის გაცნობიერება აუცილებელია. მათ უამრავი რაკეტა აქვთ იმის გათვალისწინებით, რომ ჩვენსკენ ათასზე მეტი უკვე გამოუშვეს. ამიტომ, ჩვენ ნებისმიერი სცენარისთვის მზად ვართ“, - განაცხადა მალიარმა.

მისივე თქმით, მარიუპოლის ძალიან ძლიერი და გმირული თავდაცვა უნდა განვიხილოთ მთელი სახელმწიფოს კონტექსტში, რადგან ამ ქალაქშია დღეისთვის რუსეთის ჯარის ყველაზე დიდი რაოდენობა კონცენტრირებული.

მალიარმა ასევე აღნიშნა, რომ ხდება ყველანაირი ზომების მიღება და ყველა საშუალების გამოყენება იქ ადამიანებისა და არსებული ვითარების გადასარჩენად.