პირებს, ვისი ბრალეულობაც გამოიკვეთება და მტკიცებულებები იქნება, შინაგან საქმეთა სამინისტრო აუცილებლად დააკავებს, - ასე უპასუხა შინაგან საქმეთა მინისტრის მოადგილე ალექსანდრე დარახველიძემ კითხვას, რატომ არ აკავებენ „ლაგუნა ვერესთან" მომხდარი მკვლელობის საქმეზე, მომხდარში ერთ-ერთ ფიგურანტ მარლენ მეტონიძეს.

როგორც დარახველიძემ განმარტა, საქმეზე შესაბამისი საგამოძიებო და საპროცესო მოქმედებები მიმდინარეობს.

“ეს არის უმძიმესი დანაშაული. ჩვენ ყოველდღიურ რეჟიმში აქტიურად ვმუშაობთ ყველა იმ ფიგურანტის გამოკვეთის მიმართულებით. ხედავთ, რომ ხორციელდება შესაბამისი დაკავებები, მიმდინარეობს საგამოძიებო და საპროცესო მოქმედებები. შესაბამისად, პირებს, ვისი ბრალეულობაც გამოიკვეთება და მტკიცებულებები იქნება, შინაგან საქმეთა სამინისტრო აუცილებლად დააკავებს”,- განაცხადა ალექსანდრე დარახველიძემ.

ცნობისთვის, 3 აპრილს, თბილისში, "ლაგუნა ვერესთან", გიორგი ქველიაშვილის კუთვნილი საგზაო კომპანიის ოფისში, სადაც ორმხრივი სროლა იყო, რამდენიმე ადამიანი დაჭრეს, 2 პირი - კონსტანტინე ქობულია და ვახტანგ გურგენიძე კი მოკლეს. კონსტანტინე ქობულია ეკონომიკის ყოფილი მინისტრის გიორგი ქობულიას ძმა იყო.

არსებული ინფორმაციით, გიორგი ქველიაშვილის ოფისში კონსტანტინე ქობულიასთან და ვახტანგ გურგენიძესთან სასაუბროდ მათი ნაცნობი - ბიზნესმენი მარლენ მეტონიძე 17 ადამიანთან ერთად მივიდა, რომელთაგანაც 5 პირი მისი პირადი დაცვა იყო. სიტყვიერი და ფიზიკური დაპირისპირების შემდეგ, კონსტანტინე ქობულიამ ბიზნესმენ მეტონიძისა და მისი თანმხლები პირების მისამართით გასროლა განახორციელა, რის შედეგადაც მარლენ მეტონიძე, ოთარ ბარკალაია და დავით ცისკარიშვილი დაიჭრნენ. აღნიშნული დაპირისპირებისას ბიზნესმენის დაცვის წევრმა კობა მეტრეველმა ცეცხლსასროლი იარაღიდან გასროლა განახორციელა, რასაც კონსტანტინე ქობულიას სიცოცხლე ემსხვერპლა.დაუდგენელია პირი, რომლის გასროლითაც ვახტანგ გურგენიძე გარდაიცვალა.

არსებული ინფორმაციით, მარლენ მეტონიძე შეხვედრის ადგილზე ბრონის ჟილეტით იყო მისული. დაუზუსტებელი ცნობით, ოფისში, სადაც სისხლიან გარჩევაში მონაწილე პირები მივიდნენ, იატაკზე პოლიეთილენის ცელოფნები იყო მოფენილი, რაც შესაძლოა, მკვლელობის წინასწარ განზრახვაზე მიუთითებდეს.

კონფლიქტში დაახლოებით, 20 პირი მონაწილეობდა. პროკურატურა შესაძლო დამნაშავე პირთა წრის გაზრდას არ გამორიცხავს.

საერთო ჯამში, საქმეზე 8 პირია დაკავებული, მათ შორის, განსაკუთებით მძიმე დანაშაულის შეუტყობინებლობის ბრალდებით დააკავეს გიორგი გელოვანი, გიორგი ასლანიშვილი, გიორგი პეტრუშკოვი. განზრახ მკვლელობის ბრალდებით - დაკავებულია კობა მეტრეველი, ჯანმრთელობის განზრახ მძიმე დაზიანების ბრალდებით კი, გიორგი ქველიაშვილი.