ოპოზიციურ პოლიტიკურ სპექტრში არსებობს პოლიტიკური ძალა, რომლის განცხადებები და რეალური საქმე ერთმანეთისგან აბსოლუტურად განსხვავებულია - ისინი განცხადებებს მხოლოდ პიარული სიკეთისთვის იყენებენ, რეალურად კი „მეხუთე კოლონის“ საქმეს აკეთებენ, - ეს განცხადება „ნაციონალური მოძრაობის“ მისამართით „ქართული ოცნების“ დეპუტატმა დავით მათიკაშვილმა გააკეთა.

როგორც მათიკაშვილმა აღნიშნა, უკრაინაში საპარლამენტო დელეგაციის ვიზიტისას საქართველო ერთიანი პოზიციით უნდა იყოს გამოხატული.

“შედგა კომუნიკაცია უკრაინისა და საქართველოს პარლამენტის თავმჯდომარეებს შორის. განხილულ იქნა ბევრი საკითხი. შეჯერდა პოზიციები. პარლამენტიდან მიემგზავრება დელეგაცია, რომელსაც პარლამენტის თავმჯდომარე უხელმძღვანელებს, რათა საქართველოს პარლამენტმა გამოხატოს სამძიმარი და თანადგომა ჩვენი უკრაინელი მეგობრებისა და სტრატეგიული პარტნიორების მიმართ. ფრაქცია “ქართული ოცნების“ თავმჯდომარემ ყველა პოლიტიკურ ძალას შესთავაზა, რომ მათგან თითო-თითო წარმომადგენელი გამოიყოს იმისთვის, რომ ჯგუფი შეივსოს და პარლამენტის დელეგაცია ყველა პოლიტიკური ძალით იყოს მოცული. კიდევ ერთხელ გამოჩნდება, როგორ დესტრუქციულ ძალას წარმოადგენს “ნაციონალური მოძრაობა“, - განაცხადა დავით მათიკაშვილმა.