კრემლში არავის ეპარება ეჭვი, რომ „უკრაინაში სპეცოპერაციის“ ყველა დავალება შესრულდება, - ამის შესახებ რუსეთის პრეზიდენტის პრესსპიკერმა, დიმიტრი პესკოვმა განაცხადა. ინფორმაციას BBC-ი ავრცელებს.

„ყველაზე მნიშვნელოვანია უკრაინის ნაციონალისტური ბატალიონებისგან გათავისუფლება. ოპერაცია გრძელდება და ის ამოცანები, რომელიც დგას, კარგად არის ცნობილი - ისინი უნდა შესრულდეს და შესრულდება კიდეც. ამაში ეჭვიც არ უნდა არსებობდეს", - განაცხადა პესკოვმა.

შეგახსენებთ, ვლადიმერ პუტინმა, რომელმაც რუსეთის შეიარაღებული ძალების უკრაინაში შეჭრის შესახებ გამოაცხადა, სპეცოპერაციის მიზანს უწოდა "იმ ადამიანების დაცვა, რომლებიც რვა წლის განმავლობაში ექვემდებარებოდნენ ჩაგვრასა და გენოციდს კიევის რეჟიმის მიერ". პუტინის თქმით, აუცილებელია განხორციელდეს "უკრაინის დემილიტარიზაცია და დენაციფიკაცია".