რუსეთის ფედერაციასთან სამშვიდობო ხელშეკრულება შეიძლება შედგებოდეს ორი ცალკეული დოკუმენტისგან, - ეს მოსაზრება უკრაინის პრეზიდენტმა, ვოლოდიმირ ზელენსკიმ უკრაინულ მედიასთან ინტერვიუში გამოთქვა.

ზელენსკის თქმით, ორი დოკუმენტიდან ერთი უნდა ეხებოდეს უკრაინის უსაფრთხოების გარანტიებს, მეორე კი უშუალოდ მის ურთიერთობას რუსეთის ფედერაციასთან.

„ვფიქრობ, ეს შეიძლება იყოს ორი განსხვავებული დოკუმენტი. უსაფრთხოების გარანტიები მათი მხრიდან, ვინც მზად არის ამისთვის და ცალკეული დოკუმენტი რუსეთთან“, - განმარტა ზელენსკიმ. მანვე აღნიშნა, რომ მოსკოვს სურს მხოლოდ ერთი შეთანხმება, რომელიც ყველა საკითხს შეიცავს.

„ყველას არ სურს რუსეთთან „ერთ სუფრაზე“ მოხვედრა. მათთვის უკრაინის უსაფრთხოების გარანტიები ერთი საკითხია, ხოლო რუსეთთან შეთანხმება საერთოდ სხვა საკითხია. რუსეთს სურს, რომ ყველაფერი ერთ დოკუმენტში იყოს, მაგრამ მას ეუბნებიან, უკაცრავად, მაგრამ ვნახეთ რაც მოხდა ბუჩასა და ბოროდიანკაში, ამიტომ გარემოებები იცვლება“, - განაცხადა პრეზიდენტმა.

ზელენსკიმ აღნიშნა, რომ გაერთიანებული სამეფო, შეერთებული შტატები, იტალია და თურქეთი გამოხატავენ მზადყოფნას გახდნენ უკრაინის უსაფრთხოების გარანტი ქვეყნები, მაგრამ საბოლოო პასუხი ჯერ არავისგან მიუღია.