მარიუპოლში, “აზოვსტალის” ქარხნის ტერიტორიაზე ბევრი მშვიდობიანი მოქალაქეა - ქალები, მოხუცები, ბავშვები, - Ukrinform-ის ცნობით, ამის შესახებ მარიუპოლის საპატრულო პოლიციის უფროსმა მიხაილ ვერშინინმა განაცხადა.

“„აზოვსტალის” ქარხნის ტერიტორიაზე ბევრი მშვიდობიანი მოქალაქეა: ბავშვები, ქალები, მოხუცები. ეს ადამიანები ქარხნის თავშესაფრებში იმალებოდნენ დაბომბვისგან თავის დასაცავად, მათ არ სჯერათ რუსი სამხედროების, რადგან დაინახეს, რა ხდება ქალაქში“, - განაცხადა ვერშინინმა.

მისი თქმით, რუსები მარიუპოლში დარჩენილ მშვიდობიან მოსახლეობას ნანგრევების ამოსათხრელად და გვამების შესაგროვებლად იყენებენ. ხალხი საჭმლის სანაცვლოდ „მუშაობს“, მათ შორის მასობრივ საფლავებზე. საპატრულო პოლიციის უფროსის ინფორმაციით, ქალაქში აბსოლუტურად ყველა იძულებულია ატაროს თეთრი სამკლაური (მარჯვენა ფეხსა და მარცხენა მკლავზე).

შეგახსენებთ, მარიუპოლი რამდენიმე კვირაა ალყაშია. ქალაქის უკრაინელ დამცველებს რუსულმა ძალებმა ულტიმატუმი წაუყენეს : იარაღის დასაყრელად და ჩასაბარებლად ვადა დღეს, მოსკოვის დროით 13:00 საათამდე მისცეს. უკრაინელმა სამხედროებმა ულტიმატუმის შესრულებაზე უარი განაცხადეს.