დიმიტრი პესკოვი - უკრაინული მხარე არ ავლენს თანმიმდევრულობას რუსეთთან მოლაპარაკებების დროს მიღწეული შეთანხმებების მხრივ და იცვლის პოზიციებს

უკრაინული მხარე არ ავლენს თანმიმდევრულობას რუსეთის ფედერაციასთან მოლაპარაკებების დროს მიღწეული შეთანხმებების მხრივ და იცვლის პოზიციებს, - ამის შესახებ რუსეთის პრეზიდენტის პრესსპიკერმა დიმიტრი პესკოვმა განაცხადა.

მისივე თქმით, „სპეციალური სამხედრო ოპერაცია“ გეგმის მიხედვით გრძელდება.

„სამხედრო ოპერაციის პარალელურად ექსპერტულ დონეზე გრძელდება კონტაქტი მოლაპარაკების პროცესის ფარგლებში. რა თქმა უნდა, მოლაპარაკების პროცესში პროგრესის დინამიკა უკეთესის სურვილს ტოვებს“, -განაცხადა პესკოვმა.

პესკოვის თქმით, მათ კვლავაც არ სურთ იმ ასპექტების საჯარო სიბრტყეში გამოტანა, რომლებიც უკრაინასთან მოლაპარაკებების პროცესში განიხილება.