უკრაინის პრეზიდენტი ვოლოდიმირ ზელენსკი ლიეტუვას პრეზიდენტს, გიტანას ნაუსედას ესაუბრა. ამის შესახებ ინფორმაციას უკრაინის პრეზიდენტი ვოლოდიმირ ზელენსკი ,,ტვიტერის" გვერდზე ავრცელებს.

ზელენსკის თქმით, ლიდერებს შორის საუბარი უკრაინაში მიმდინარე საომარ ვითარებასა და რუსეთის მიმართ დაწესებულ სანქციებს შეეხებოდა.

,,ლიეტუვას პრეზიდენტ გიტანას ნაუსედასთან დიალოგი გაგრძელდა. მას, ფრონტზე არსებული ვითარებისა და მარიუპოლის გმირული დაცვის შესახებ ვაცნობე, უსაფრთხოების მიმართულებით მხარდაჭერისთვის მადლობა გადავუხადე, ამ დახმარების ზრდას ევროკავშირის ფარგლებში ველოდებით. ჩვენ უნდა გავაძლიეროთ სანქციები", - წერს ზელენსკი.

შეგახსენებთ, ლიეტუვას პრეზიდენტი გიტანას ნაუსედა, ლატვიის, ესტონეთისა და პოლონეთის ლიდერებთან ერთად, 13 აპრილს უკრაინაში იმყოფებოდა.