გაერთიანებული სამეფო რუსეთისთვის დახმარების გაწევის საკითხს არ განიხილავს,- ამის შესახებ გაერთიანებული სამეფოს სახელმწიფო მინისტრმა ჩრდილოეთ ირლანდიის საკითხებში, ბრენდონ ლუისმა განაცხადა, რითაც ის რუსული ძალების მიერ ორი ბრიტანელი მამაკაცის დატყვევების შესახებ გავრცელებულ ინფორმაციას გამოეხმაურა.

Sky News-ს შეკითხვაზე, განიხილავდა თუ არა მთავრობა ბრიტანეთის მოქალაქეების გაცვლის საკითხს, ბრენდონ ლუისმა უპასუხა : „ჩვენ რეალურად ვახორციელებთ იმ ადამიანების წინააღმდეგ სანქციების დაწესების პროცესს, რომლებიც პუტინის რეჟიმთან არიან დაახლოებულები, არ ვაპირებთ იმის განხილვას, თუ როგორ შეგვიძლია დავეხმაროთ რუსეთს“, - აღნიშნა ლუისმა.

მოგვიანებით მან BBC-ს განუცხადა, რომ არ სურდა დამატებითი კომენტარის გაკეთება ორი ბრიტანელი საქმესთან დაკავშირებით და ხაზი გაუსვა, რომ ბრიტანელები უკრაინაში არ უნდა წავიდნენ.

„ადამიანები არ უნდა გაჰყვნენ უკანონო გზას ძალიან სახიფათო სიტუაციაში. ნამდვილად უნდა ვიყოთ ძალიან მკაფიო, ეს არ არის ის, რაც მათ უნდა გააკეთონ,“- აღნიშნა ლუისმა.

შეგახსენებთ, ორი ბრიტანელი მამაკაცი, რომელიც რუსული ძალების ტყვეობაში იმყოფება, რუსულ სატელევიზიო არხზე გამოჩნდა. ისინი გაერთიანებული სამეფოს პრემიერ-მინისტრს, ბორის ჯონსონს მიმართავდნენ და სთხოვდნენ, უკრაინაში დაკავებულ პრორუს პოლიტიკოსში, ვიქტორ მედვედჩუკში გაეცვალათ.