რუმინეთის პრეზიდენტის, კლაუს იოჰანისის განცხადებით, უკრაინაში არსებული ამჟამინდელი ვითარების გათვალისწინებით, საჭიროა კოორდინაცია და ერთიანობა. ამის შესახებ რუმინეთის პრეზიდენტმა ჯო ბაიდენის მიერ, აშშ-ის პარტნიორებთან გამართული ვიდეო კონფერენციის დასრულების შემდეგ „ტვიტერის“ გვერდზე დაწერა.

„მე ხაზგასმით აღვნიშნე, რომ უსაფრთხოების ამჟამინდელი კონტექსტი კოორდინაციასა და ერთიანობას, ასევე აღმოსავლეთ ფლანგზე, ნატო-ს შეკავებისა და თავდაცვის პოზიციის შემდგომ გაძლიერებას მოითხოვს", - წერს იოჰანისი.

შეგახსენებთ, ცოტა ხნის წინ დასრულდა შეხვედრა, რომელიც აშშ-ის პრეზიდენტის, ჯო ბაიდენის ინიციატივით, მოკავშირეებთან, უკრაინაში რუსეთის მიერ განხორციელებულ ბოლო შეტევასა და შემდგომ სანქციებს შეეხებოდა. ვიდეო კონფერენციას მსოფლიოს სხვადასხვა ლიდერები ესწრებოდნენ.