თუ მათ აქვთ იარაღი, რაც უკრაინას აქ, ახლა სჭირდება, თუ აქვთ საბრძოლო მასალა, რომელიც ჩვენ გვჭირდება აქ და ახლა, მათი მორალური მოვალეობაა, პირველ რიგში, თავისუფლების დაცვას დაეხმარონ, - ამის შესახებ უკრაინის პრეზიდენტმა ვოლოდიმირ ზელენსკიმ ომის 55-ე დღის შემაჯამებელ ვიდეომიმართვაში პარტნიორების მიერ, უკრაინის მიმართ საჭირო იარაღის მიწოდების შესახებ საუბრისას განაცხადა.
ზელენსკის თქმით, ამჟამად, დამპყრობელთა არმიის პრაქტიკულად მთელი საბრძოლო მზადყოფნა უკრაინის ტერიტორიაზეა კონცენტრირებული.
"მათ, უკრაინის წინააღმდეგ თავდასხმისთვის ყველა და ყველაფერი გამოიყვანეს, რასაც ჩვენს წინააღმდეგ ბრძოლა შეუძლია. ის, თუ როგორ იცავს თავს მთელი ჩვენი ერი, აჩვენებს, რომ უკრაინის არმია გლობალურ რეიტინგებში რუსეთზე მაღლა ყოფნას იმსახურებს. ჩვენ რომ გვქონდეს წვდომა ყველა იმ იარაღზე, რომელიც ჩვენ გვჭირდება, რომელიც ჩვენ პარტნიორებს აქვთ, ჩვენ ამ ომს უკვე დავასრულებდით, ჩვენ უკვე მშვიდობას აღვადგენდით და ოკუპანტებისგან ჩვენს ტერიტორიებს გავათავისუფლებდით. უსამართლოა, რომ უკრაინა კვლავ იძულებულია მოითხოვოს ის, რასაც მისი პარტნიორები სადღაც, წლების განმავლობაში ინახავდნენ. თუ მათ აქვთ იარაღი, რაც უკრაინას აქ, ახლა სჭირდება, თუ აქვთ საბრძოლო მასალა, რომელიც ჩვენ გვჭირდება აქ და ახლა, მათი მორალური მოვალეობაა, პირველ რიგში, თავისუფლების დაცვას დაეხმარონ. დაეხმარეთ ათასობით უკრაინელის სიცოცხლეს", - განაცხადა ზელენსკიმ.